*नवी मुंबईत वनमंत्री गणेश नाईक यांच्या उपस्थितीत तिरंगा रॅलीत देशभक्तीचा जल्लोष*
नवी मुंबई (प्रतिनिधी) :
‘घरोघरी तिरंगा – हर घर स्वच्छता’ या मोहिमेअंतर्गत नवी मुंबई महापालिकेच्या वतीने महापालिका आयुक्त डॉ. कैलास शिंदे यांच्या मार्गदर्शनाखाली तिरंगा रॅलींचे भव्य आयोजन करण्यात आले.
बुधवार, दि. १३ ऑगस्ट २०२५ रोजी डॉ. बाबासाहेब आंबेडकर नगर, रबाळे येथील राजर्षी छत्रपती शाहू महाराज विद्यालय (नमुंमपा शाळा क्र. ५५) येथे महाराष्ट्र राज्याचे वनमंत्री तथा नवी मुंबईतील जनतेचे लोकप्रिय नेते गणेश नाईक यांच्या प्रमुख उपस्थितीत भव्य रॅली काढण्यात आली. मंत्री नाईक यांच्या हस्ते ध्वजारोहण होऊन उपस्थितांसाठी प्रेरणादायी भाषण करण्यात आले. त्यांनी विद्यार्थ्यांना राष्ट्रभक्तीचे महत्व, स्वच्छतेची गरज आणि एकतेचे बळ याबद्दल मार्गदर्शन केले. त्यांच्या उपस्थितीमुळे रॅलीला विशेष उत्साह आणि प्रेरणा मिळाली.
या वेळी माजी महापौर सुधाकर सोनवणे, शिक्षण उपआयुक्त श्रीमती संघरत्ना खिल्लारे, परिमंडळ २ चे उपआयुक्त संजय शिंदे, सहाय्यक आयुक्त उत्तम खरात, स्वच्छता अधिकारी विजय पडघन, तसेच शाळेचे मुख्याध्यापक अमोल खरसंबळे व श्रीमती स्नेहल विशे यांसह शिक्षक, पालक व विद्यार्थी मोठ्या संख्येने उपस्थित होते.
याच दिवशी सीबीडी बेलापूर येथील महापालिका मुख्यालय परिसरातही तिरंगा रॅलीचे आयोजन करण्यात आले. बेलापूरगाव येथील नमुंमपा शाळा क्र. ०१ चे विद्यार्थी उत्साहाने सहभागी झाले. घनकचरा व्यवस्थापन विभागाचे उपआयुक्त डॉ. अजय गडदे, शिक्षण अधिकारी श्रीमती सुलभा बारघरे आणि स्वच्छता अधिकारी व निरीक्षक यावेळी उपस्थित होते. विद्यार्थ्यांनी महापालिका मुख्यालयात भरविण्यात आलेल्या तिरंगा प्रदर्शनाला भेट देत तिरंगा ध्वजाचा ऐतिहासिक प्रवास जाणून घेतला.
तिरंगा रॅलीदरम्यान विद्यार्थ्यांनी ‘घरोघरी तिरंगा – घरोघरी स्वच्छता’ अशा देशभक्तीपर घोषणा देत, तिरंगी झेंडे फडकवत व घोषणांचे फलक उंचावत परिसरात राष्ट्रभक्तीचा उत्साह पसरविला. वनमंत्री गणेश नाईक यांच्या नेतृत्वस्पर्शामुळे या उपक्रमाला एक वेगळीच उंची लाभली.
