प्रतिबंधित ऑनलाईन गेमिंगद्वारे सायबर फसवणूक करणाऱ्या १२ जणांच्या टोळीला नवी मुंबई पोलिसांची धडक कारवाई — देशभरातील ८८६ बँक खात्यांचा गैरवापर उघडकीस
नवी मुंबई (प्रतिनिधी)
नवी मुंबई पोलिसांच्या गुन्हे शाखेच्या मध्यवर्ती कक्षाने सायबर गुन्ह्यांवर मोठी कारवाई करत प्रतिबंधित ऑनलाईन गेमिंगच्या माध्यमातून देशभरात फसवणूक करणाऱ्या १२ जणांच्या टोळीला अटक केली आहे. या टोळीने विविध बँकांच्या तब्बल ८८६ खात्यांचा वापर करून सायबर फसवणुकीचे जाळे उभारल्याचे तपासात उघड झाले आहे.
ही कारवाई पोलीस आयुक्त श्री. मिलिंद भारंबे, पोलीस सह आयुक्त श्री. संजय येनपुरे, अपर पोलीस आयुक्त (गुन्हे) श्री. दीपक साकोरे, व पोलीस उप आयुक्त (गुन्हे) श्री. सचिन गुंजाळ यांच्या मार्गदर्शनाखाली करण्यात आली. केंद्र शासनाने राष्ट्रीय सायबर सुरक्षा जागरूकता ऑक्टोबर महिन्यात अधिकाधिक सायबर गुन्ह्यांचे उघडकीस आणण्यासाठी राज्यांना दिलेल्या सूचनेनुसार ही धडक मोहिम राबविण्यात आली.
सीबीडी बेलापूर पोलिस ठाण्यात नोंद झालेल्या गुन्हा क्र. ४०२/२०२५ नुसार, इम्रान उस्मानी मिनहाज शेख (वय २२, रा. नेरूळ, नवी मुंबई) या मुख्य आरोपीकडून चौकशी केली असता, त्याने शासनमान्य गेमिंग अ‍ॅप्ससाठी बँक खाते उघडण्याचे आमिष दाखवून नागरिकांना फसवले असल्याचे निष्पन्न झाले. नागरिकांकडून बँकेचे पासबुक, एटीएम कार्ड, चेक बुक, सिम कार्ड इत्यादी किट घेऊन तो डोंबिवली येथील रुनावल गार्डन बिल्डिंगमध्ये पाठवत असे.
या ठिकाणी पोलिसांनी केलेल्या धाडीत प्रतिबंधित ऑनलाईन गेमिंग आणि सायबर फसवणुकीचे प्रकार सुरू असल्याचे आढळले. पंचनामा करून पाच आरोपींना अटक करण्यात आली. पुढील तपासादरम्यान पुणावळे (पिंपरी चिंचवड) येथील सोमानी ग्रीन होममध्ये आणखी सहा आरोपी सायबर फसवणुकीच्या कार्यात गुंतलेले असल्याचे उघड झाले. तिथेही छापा टाकून सहा आरोपींना अटक करण्यात आली.
तपासात या टोळीने “[www.Ramesh247.com”](http://www.Ramesh247.com”), “[www.upi9.pro.com”](http://www.upi9.pro.com”) आणि “[www.Reddybook.blue”](http://www.Reddybook.blue”) या वेबसाईट्सद्वारे ऑनलाईन गेमिंग आणि सायबर फसवणुकीचे व्यवहार केले असल्याचे समोर आले आहे. देशभरातील एन.सी.सी.आर.पी. पोर्टलवरील एकूण ३९३ तक्रारींमध्ये या टोळीचा सहभाग असल्याचे पोलिसांनी स्पष्ट केले असून, अंदाजे ८३ कोटी ९७ लाख ४८ हजार २७८ रुपयांची फसवणूक झाल्याचे तपासात निष्पन्न झाले आहे.
पोलिसांनी एकूण ५२ मोबाईल फोन, ७ लॅपटॉप, ९९ विविध बँकांचे डेबिट कार्ड, ६४ पासबुक आणि एक टाटा सफारी स्टॉर्म कार असा सुमारे १८ लाख ५ हजार रुपयांचा मुद्देमाल जप्त केला आहे.
ही कारवाई सहाय्यक पोलीस आयुक्त श्री. अजयकुमार लांडगे यांच्या मार्गदर्शनाखाली वरिष्ठ पोलीस निरीक्षक श्री. सुनिल शिंदे यांच्या नेतृत्वाखालील मध्यवर्ती कक्षाच्या पथकाने केली. या पथकात सपोनि श्रीनिवास तुंगेनवार, सपोनि सचिन कोकरे, सपोनि सतिश भोसले, सपोनि महेश जाधव, पो.उपनि. राहुल भदाने, स.पो.उपनि. मंगेश वाट, तसेच पोलीस अंमलदार अनिल यादव, नितीन जगताप, महेश पाटील, संजय राणे, सतिश चव्हाण, निलेश किंद्रे, सचिन टिके, अजय कदम, दिलीप ठाकूर, सोमनाथ काळे, राहुल वाघ, नवनाथ पाटील, औंकार भालेराव आणि पूजा वैद्य यांनी विशेष परिश्रम घेतले.
सायबर गुन्ह्यांविरुद्ध नवी मुंबई पोलिसांची ही कारवाई राज्यभरात अनुकरणीय ठरत असून, सामान्य नागरिकांना ऑनलाईन गेमिंगच्या नावाखाली होणाऱ्या फसवणुकीपासून सावध राहण्याचे आवाहन करण्यात आले आहे.
