सीबीडी पोलिसांकडून सायबर सुरक्षा जनजागृती व हत्यारांबाबत मार्गदर्शन
नवी मुंबई – सीबीडी पोलीस ठाण्याच्या वतीने डी.वाय. पाटील स्कूल, बेलापूर सेक्टर-४ येथे विद्यार्थ्यांसाठी सायबर सुरक्षा जनजागृती कार्यक्रम आयोजित करण्यात आला. आज दिनांक २९ ऑक्टोबर २०२५ रोजी सकाळी ११.०० ते ११.३० वाजेच्या दरम्यान झालेल्या या कार्यक्रमात विद्यार्थ्यांना आणि शिक्षकांना सायबर गुन्हेगारीपासून स्वतःचे संरक्षण कसे करावे याबाबत सविस्तर मार्गदर्शन करण्यात आले.
कार्यक्रमादरम्यान मोबाईल आणि इंटरनेट फसवणूक, ऑनलाइन शॉपिंग, फेक लिंक, सोशल मीडियावरील फसवणूक (इंस्टाग्राम, फेसबुक), मालवेअर, फोनपे-गुगलपे फ्रॉड, ऑनलाइन ट्रेडिंग आणि डिजिटल अरेस्ट फसवणूक अशा विविध प्रकारच्या गुन्ह्यांबाबत विद्यार्थ्यांना जागरूक करण्यात आले. तसेच एनसीसीआरपी पोर्टल आणि सायबर फसवणूक हेल्पलाइन क्रमांक १९३० याबाबतही माहिती देण्यात आली.
या वेळी नवी मुंबई पोलिस दलाच्या अधिकृत व्हॉट्सअ‍ॅप आणि इंस्टाग्राम पेजची माहिती विद्यार्थ्यांना देण्यात आली. कार्यक्रमास सुमारे १०० ते १२० विद्यार्थी व शिक्षक उपस्थित होते.
या प्रसंगी सीबीडी पोलीस ठाण्याचे वरिष्ठ पोलीस निरीक्षक अरुण पवार यांच्या मार्गदर्शनाखाली पोलीस निरीक्षक (सायबर कक्ष) बालाजी पावणे यांनी उपस्थितांना सायबर सुरक्षेबाबत महत्त्वपूर्ण माहिती दिली. तसेच पोलीस ठाणे कडून पोलिस मुख्यालयातर्फे हत्यारांबाबतही आवश्यक मार्गदर्शन करण्यात आले.
