*कोपरखैरणे पोलीस ठाण्यांतर्फे सायबर सुरक्षा जनजागृती उपक्रम राबविण्यात आला*
नवी मुंबई :(प्रतिनिधी) वाढत्या सायबर गुन्ह्यांच्या पार्श्वभूमीवर नागरिक आणि विद्यार्थ्यांमध्ये सायबर सुरक्षेबाबत जागरूकता निर्माण करण्याच्या उद्देशाने कोपरखैरणे पोलीस ठाण्याच्या वतीने सायबर सुरक्षा जनजागृती मोहिम राबविण्यात आली. या मोहिमेचे आयोजन वरिष्ठ पोलीस निरीक्षक उमेश गवळी यांच्या मार्गदर्शनाखाली करण्यात आले.
या मोहिमेत कोपरखैरणे विभागाचे पोलीस अधिकारी व कर्मचारी पोलीस उपनिरीक्षक गजानन टाकळे, पोलीस अंमलदार जाधव , तसेच महिला पोलीस अंमलदार गौरी चांदे व यांनी सहभाग घेतला. त्यांनी कोपरखैरणे पोलीस ठाणे हद्दीतील विविध ठिकाणी प्रत्यक्ष भेट देत नागरिक आणि विद्यार्थ्यांना सायबर सुरक्षेबाबत माहिती दिली.
या उपक्रमांतर्गत सेंट मेरी हायस्कूल (सेक्टर 10, कोपरखैरणे), घणसोली रेल्वे स्टेशन परिसर, तसेच कोपरखैरणे तलाव व परिसरातील विविध सोसायट्या येथे भेट देण्यात आली. या ठिकाणी नागरिक आणि विद्यार्थ्यांना मानवी साखळीच्या माध्यमातून सायबर गुन्ह्यांविषयी जनजागृती करण्यात आली.
या वेळी मोबाईल आणि इंटरनेट फसवणूक, ऑनलाइन शॉपिंग, फेक लिंक, सोशल मीडियावरील (इंस्टाग्राम, फेसबुक) फ्रॉड, मालवेअर, फोन पे व गुगल पे फसवणूक, ऑनलाइन ट्रेडिंग फ्रॉड, डिजिटल अरेस्ट फ्रॉड यासंबंधी सविस्तर माहिती देण्यात आली. तसेच *एनसीसीआरपी पोर्टल व सायबर फसवणुकीसाठी हेल्पलाईन क्रमांक 1930* याचीही माहिती उपस्थितांना देण्यात आली.
नवी मुंबई पोलिस दलाचे अधिकृत व्हॉट्सअप व इंस्टाग्राम पेज यांची माहिती देऊन नागरिकांना सतर्क राहण्याचे आणि संशयास्पद ऑनलाइन व्यवहारांची तात्काळ तक्रार करण्याचे आवाहन करण्यात आले.
या जनजागृती मोहिमेमुळे नागरिकांमध्ये सायबर सुरक्षेविषयी जागरूकता वाढत असून, भविष्यात सायबर गुन्ह्यांना आळा बसण्यास मदत होईल, असा विश्वास वरिष्ठ पोलीस निरीक्षक उमेश गवळी यांनी व्यक्त केला.
