गणेशोत्सव व ईद-ए-मिलाद २०२५ अनुषंगाने पोलीस उपाययोजना – पोलीस उप आयुक्त, परिमंडळ-१, वाशी यांच्या अध्यक्षतेखाली समन्वय बैठक संपन्न
नवी मुंबई (वाशी) – आगामी गणेशोत्सव व ईद-ए-मिलाद २०२५ हे सण शांततेत, सलोख्याच्या वातावरणात व सुरळीत पार पाडण्यासाठी परिमंडळ-१, वाशी तर्फे समन्वय बैठकीचे आयोजन करण्यात आले होते.
दिनांक २० ऑगस्ट २०२५ रोजी सायंकाळी ६.०० वा. वाशी सेक्टर-६ येथील साहित्य मंदिर सभागृहात झालेल्या या बैठकीस पोलीस उप आयुक्त श्री. पंकज डहाणे अध्यक्षस्थानी होते. बैठकीत गणेशोत्सव मंडळांचे पदाधिकारी, ईद-ए-मिलाद कमिटीचे पदाधिकारी, शांतता समिती सदस्य तसेच संबंधित शासकीय विभागाचे अधिकारी मोठ्या संख्येने उपस्थित होते.
या बैठकीस सहायक पोलीस आयुक्त रबाळे विभाग श्री. राहुल धस, सहायक पोलीस आयुक्त वाशी विभाग श्री. आदिनाथ बुधवंत, वाहतूक विभागाचे सहायक पोलीस आयुक्त श्री. विजय चौधरी, परिमंडळ-१ मधील सर्व पोलीस ठाण्यांचे प्रभारी अधिकारी, नवी मुंबई महापालिका वाशी विभागाचे वॉर्ड ऑफिसर श्री. सुखदेव येडवे, महावितरणचे सहायक अभियंता श्री. अरविंद घासे, श्री. मेहुल बागुल, श्री. अश्विन कुमार धसवडीकर तसेच वाशी अग्निशमन विभागाचे सेक्शन ऑफिसर श्री. रोहन कोकाटे आणि नवी मुंबई महानगरपालिका रुग्णालयाचे डी.एम.ओ. डॉ. प्रकाश राठोड उपस्थित होते.
बैठकीदरम्यान संबंधित शासकीय यंत्रणांकडून सण-उत्सव सुरळीत पार पाडण्यासाठी करण्यात आलेल्या उपाययोजना तसेच भविष्यात करावयाच्या उपाययोजनांचा आढावा घेण्यात आला. गणेशोत्सव मंडळे व ईद-ए-मिलाद कमिटी पदाधिकाऱ्यांनी पोलीस प्रशासनाच्या या उपक्रमाचे स्वागत केले. या वेळी गणेश मंडळाचे पदाधिकारी श्री. निलेश कचरे (सानपाडा), श्री. संपत शेवाळे (वाशी) तसेच ईद-ए-मिलाद कमिटी तुर्भेचे श्री. मोहम्मद खलीलुल्लाह सुभानी आणि श्री. आलम बाबा यांनी मनोगत व्यक्त केले.
तसेच श्री. सखाराम शेलार, श्री. प्रभाकर चांदे, श्री. अंकुश वैती, श्री. पोपट पवार, श्री. शरद मोरे, श्री. शाहनवाज यांनी मिरवणुकीच्या अनुषंगाने काही सूचना मांडल्या. एकूण २६५ नागरिक बैठकीस उपस्थित होते.
पोलीस उप आयुक्त श्री. डहाणे यांनी सर्व उपस्थितांना मार्गदर्शन करून, सण-उत्सव शांततेत पार पाडण्यासाठी प्रशासनास सहकार्य करण्याचे आवाहन केले. कार्यक्रमाच्या शेवटी वरिष्ठ पोलीस निरीक्षक, एपीएमसी पोलीस ठाणे श्री. अजय शिंदे यांनी आभार प्रदर्शन केले. राष्ट्रगीताने कार्यक्रमाचा समारोप झाला.
