*पोलीस स्थापना दिनानिमित्त एपीएमसी वाहतूक शाखेचा सत्रा प्लाझा येथे रस्ता सुरक्षा जनजागृती उपक्रम*
प्रतिनिधी:- जनतेचा सावधान महाराष्ट्र
नवी मुंबईतील एपीएमसी परिसरात पोलीस स्थापना दिनाचे औचित्य साधून एपीएमसी वाहतूक शाखेच्या वतीने सत्रा प्लाझा येथे रस्ता सुरक्षा व वाहतूक नियमांबाबत व्यापक जनजागृती कार्यक्रम राबविण्यात आला. सदर उपक्रम पोलीस निरीक्षक भांडवलकर यांच्या मार्गदर्शनाखाली पोलीस उपनिरीक्षक बळीराम घंटे तसेच वाहतूक शाखेतील अधिकारी व कर्मचाऱ्यांच्या उपस्थितीत यशस्वीपणे पार पडला.
या कार्यक्रमादरम्यान नागरिक, वाहनचालक, दुचाकीस्वार तसेच पादचाऱ्यांना मोटार वाहन कायदा व शासनाने घालून दिलेल्या वाहतूक नियमांची माहिती देण्यात आली. हेल्मेटचा अनिवार्य वापर, सीट बेल्टचे महत्त्व, वेगमर्यादेचे पालन, सिग्नलचे काटेकोर पालन, मद्यपान करून वाहन न चालविणे, मोबाईल वापर टाळणे तसेच झेब्रा क्रॉसिंगचा योग्य वापर याबाबत प्रत्यक्ष प्रात्यक्षिके व संदेशफलकांच्या माध्यमातून प्रभावी प्रबोधन करण्यात आले.
यावेळी रस्ता अपघातांचे वाढते प्रमाण लक्षात घेता नागरिकांनी स्वतःच्या व इतरांच्या सुरक्षिततेसाठी वाहतूक नियमांचे पालन करणे अत्यंत आवश्यक असल्याचे आवाहन करण्यात आले. शासनाच्या मार्गदर्शक सूचनांनुसार सुरक्षित वाहतूक ही केवळ पोलिसांची जबाबदारी नसून प्रत्येक नागरिकाची सामूहिक जबाबदारी आहे, असा संदेश उपस्थितांना देण्यात आला.
कार्यक्रमात नागरिकांचा उत्स्फूर्त प्रतिसाद लाभला. काही ठिकाणी विशेष वेषभूषेतील प्रबोधनात्मक पात्रांच्या माध्यमातून लहान मुले, युवक व ज्येष्ठ नागरिकांपर्यंत रस्ता सुरक्षेचा संदेश सोप्या पद्धतीने पोहोचविण्यात आला. अशा प्रकारचे उपक्रम नियमितपणे राबविल्यास अपघातांचे प्रमाण निश्चितच कमी होईल, असा विश्वास यावेळी व्यक्त करण्यात आला.
पोलीस स्थापना दिनानिमित्त राबविण्यात आलेला हा उपक्रम समाजहिताच्या दृष्टीने अत्यंत उपयुक्त असून भविष्यातही एपीएमसी वाहतूक शाखेमार्फत अशाच प्रकारचे जनजागृती उपक्रम सातत्याने राबविण्यात येणार असल्याचे अधिकाऱ्यांनी सांगितले.
